每次去旅行都系一个唔同既经验。有时可能无惊无险，但有时就会有不愉快经历，搞到你有排都唔想再坐飞机。但如果你可以唔使喺机场同人迫，重可以享受好似酒店或者Spa咁一流既设施同服务，咁就唔同讲法啦！
如果你经常出TRIP去旅行，或者信用卡有旅游优惠既话，对机场贵宾室应该唔会陌生。机场贵宾室呢啲咁豪华既地方，系为左VIP乘客而设。想像一下，旅游旺季既机场人迫迫，想食野又要排，去厕所又要排，分分钟连位都唔多个！呢个时候，机场贵宾室简直系天赐既礼物。
不过，称得上系奢华机场贵宾室，当然唔止系有个地方落脚咁简单。除左基本野之外，重有一大堆高级设施任用，务求连最刁钻既客人都服待得贴贴服服。MoneyHero为你搜罗左全球12间奢华机场贵宾室，有啲豪华到真系连五星级酒店都要企埋一边呀！（以下排名不分先后）
1.LufthansaFirstClassLounge（汉莎航空＠法兰克福机场）
汉莎航空既贵宾室喺法兰克福机场第1航厦附近。点解系喺航厦附近，唔系喺入面？因为呢间贵宾室十分巴闭，已经唔止系一间「贵宾室」，而系成幢独立既2层贵宾大楼！当然，要用尊贵服务就要付出代价，只有头等客舱乘客和HONCircle会员先至用得架。
渠入面既设施真系有咁豪得咁豪，唔止有私人雪茄房，重有私人助理帮你搞登机手续，代客泊车，连登机都有专车接送。VIP重可以享用私人休息室训觉，或者喺浴室冲凉，连黄色冲凉鸭仔都会准备好等你！
2.AlMourjanBusinessLounge（卡达航空＠多哈哈马德国际机场）
卡达航空呢家五星级航空公司为左令乘客觉得宾至如归，一啲都唔手软。继之前喺旧多哈国际机场起左一个私人航厦比头等同商务舱客人，宜家又有新搞作，喺新既多哈机场3楼，起左个一万平方米，全球最大既贵宾室！贵宾室维持卡达航空一贯既高水准，入面装修典雅，融合左传统阿拉伯风格。
头等同商务舱乘客可以系入面用独立冲凉房啲就唔再讲，野食方面，除左finedining，重有自助餐食。咁都唔止，每个私家位都有自己一个萤幕，玩咩都得！除止之外，最劲既就系渠地既游戏室，有仿古玻璃足球机，同埋1比1既F1赛车模拟器，真系可以坐入架车度玩架！
3.VirginAtlanticClubhouse（维珍航空＠伦敦希斯路机场）
VirginAtlanticClubhouse位于伦敦希斯路机场既第3航厦。要数全球最正既机场贵宾室，呢个位于英国最繁忙既机场既贵宾室，每次都一定榜上有名。VirginAtlanticClubhouse只系比维珍航空既「非凡Suite」乘客同埋维珍飞行会金卡会员先可以用。贵宾室既装修行复古路线，除左一流既餐厅、酒吧之外，当然唔少得特别既设施，包括可以SET头、剪头发、修甲既SALON，重有水疗中心做Spa，重有得免费上网添！
其实维珍航空其他贵宾室都相当出名，例如纽约既甘迺迪国际机场，或者伦敦既格域机场既贵宾室都一样令人赞不绝口。
4.LaPremièreLounge（法国航空＠巴黎戴高乐机场）
巴黎戴高乐机场既第2航厦，设有法国航空全新打造既LaPremièreLounge，为VIP乘客提供度身订度既服务。贴心服务包括：简单快捷CHECK-IN、高级轿车接送、行李运送等等…
贵宾室入面有舒服既空间，比你做野或者休息，重有全身按摩、SPA，米芝莲大厨AlainDucasse设计既餐单，图书室等等…重可以用埋法航既APP下载报纸杂志，喺机上面睇！
5.TheCenturionLounge（美国运通卡＠三藩市国际机场）
呢间贵宾室系2014年11月先开幕，位于三藩市国际机场既第3航厦，旅客谂到想要既野，渠都有！例如秘书服务，会帮你book野同预约餐厅等等…重有独立工作间，大电视比你打机或者睇戏，重有米芝莲大厨主理既餐饮！贵宾室重同好多公司同品牌合作，一啲都唔马虎，例如入面用既护肤品就系用由L'OCCITANE提供既。
好多贵宾室都系由航空公司打理，但呢个就比较特别，系少数由信用卡公司提供既贵宾室。只要你系美国运通卡持卡人，就可以用，比起其他要坐头等或者商务舱先入得既贵宾室，亲民得多。所以下次如果去三藩市，千其唔好走宝！
67.「寰宇堂」、「玉衡堂」（国泰航空＠香港国际机场）
唔使下下觉得外国月亮圆啲，其实我地香港机场都有两个豪华机场贵宾室！
「寰宇堂」系国泰航空既旗舰贵宾室，位于离境大堂南客运廊1-4号闸口附近。入面再分左「头等贵宾室」同「商务贵宾室」，环境舒服，布置简约得黎，又不失时髦既感觉。最正既系，入面有好多VIP专享设施，唔止酒吧、阅读室、会议室、私人淋浴间、连buffet都有得你食！
而「玉衡堂」就喺西北客运廊5楼，闸口62-66号附近，系国泰航空新开既贵宾室。「玉衡堂」既卖点就系「风味坊」，入面有唔同CAFE，重有即制面食。同时，重有商务中心连全天候WIFI。
国泰航空其实喺香港机场重有三个贵宾室：「逸连堂」、「尔雅堂」同「赏心堂」，真系行都边都可以享受顶级服务！
8.TheRoyalOrchidLounge（泰国国际航空＠曼谷素万那普机场）
泰航头等同商务舱乘客，如果想坐完长途机之后放松下，就可以去曼谷素万那普机场E客运廊既RoyalOrchidLounge。餐厅、冲凉房、商务中心呢啲就唔少得架啦，RoyalOrchidLounge重有个人音响室同睡房（冇错，系真系睡房！唔系休息区），最啱需要静静地休息，或者需要补眠既旅客。
另外，位于D客运廊既SPA贵宾室都系一大卖点。如果你系皇家头等舱或者皇家客舱既乘客，就可以享用健身房、Jagucci、传统泰式按摩！听落真系好吸引！
9.EtihadPremiumLounge（阿提哈德航空＠阿布达比国际机场）
其他野唔睇，净系见到个地点系阿布达比国际机场，即系「阿拉伯联合大公国阿布达比酋长国」，就知呢间贵宾室系顶级奢华既代表。
EtihadPremiumLounge位于第3航厦既闸口35附近。一样都系有野食、冲凉房、商务中心等等…特别之处在于渠有水疗中心可以做spa，而如果你有小朋友一齐，做SPA既时候重有保姆会帮你凑小朋友，服务实在太周到啦！唔止咁，渠地重有秘书服务（即系好似黑卡嗰种），可以帮你搞掂落黎去旅行未BOOK既野，拎你啲衫去洗等等…
10.QantasInternationalFirstLounge（澳洲航空＠悉尼国际机场）
悉尼国际机场入面既QantasInternationalFirstLounge有一系列既设施可以用，唔止舒服，重好方便。除左最基本既冲凉房（有埋化妆品，真系好贴心！）同餐厅之外，重有会议室、SPA、上网区（全部都系用APPLE电脑架），同埋有齐最新报纸杂志既图书室添！喺入面等转机或者DELAY都大把野做。
要用贵宾室，就要系澳航同埋阿联酋航空既头等舱乘客，澳航飞行常客白金卡会员，或者指定寰宇一家成员。
11.SilverKrisLounges（新加坡航空＠新加坡樟宜机场）
SilverKrisLounges廿四小时开放，喺新加坡樟宜机场既第2同第3航厦都有，只限头等舱、商务舱乘客，或者新航PPS俱乐部会员使用。渠既设施包括各种冷热食物、私人冲凉房、商务中心（连WIFI）、育婴室等等…最正既地方系有无敌大海景，同埋电视休息区！
12.GoldenLounge（马来西亚航空＠吉隆坡国际机场）
马来西亚航空既GoldenLounge系渠地既旗舰贵宾室。比起其他我地介绍左既贵宾室，GoldenLounge可能比较低调，但渠啱啱翻新，加上各种设施应有尽有，对成日要喺亚洲出trip既人既讲，值得占一席位。
GoldenLounge位于吉隆坡国际机场既A客运大楼，专为头等同埋EnrichPlatinum既会员而设。喺入面有自助餐同埋其他餐点、私人睡房、冲凉房、商务中心、电脑连上网、酒吧、回教祈祷室同埋育婴室。
